Gunnar Steinn og félagar í Nantes í góðri stöðu

Nantes skellti Pick Szeged í EHF-bikarnum í handbolta í dag í Frakklandi 31-23. Nantes er því á toppi C-riðils þegar ein umferð er eftir,  komið í átta liða úrslit.

Bæði lið voru komin í átta liða úrslit þegar flautað var til leiks í dag en Pick Szeged vann fyrri leik liðanna í riðlinum með einu marki. Nantes er því komið í efsta sætið og sigri liðið Tatran Presov í Slóvakíu í lokaleiknum vinnur liðið riðilinn og fær því lið sem hafnar í öðru sæti í átta liða úrslitum.

Nantes var sterkari aðilinn allan leikinn og var 15-10 yfir í hálfleik. Gunnar Steinn Jónsson skoraði eitt mark í leiknum en Nicolas Claire og Nicoals Tournat skoruðu sex mörk hvor og Alberto Entrerrios 5.

Svíinn Jonas Källman skoraði sex mörk fyrir ungverska liðið og Zsolt Balogh 5.