Varist að vera í of stuttum buxum!

Unnur Pálmarsdóttir, framkvæmdastjóri Fusion og einkaþjálfari World Class, er með áralanga reynslu af líkamsræktarbransanum.

Hún gefur lesendum Lífsins sem vilja skella sér í hópatíma á líkamsræktarstöðvunum góð ráð um hvernig sé best að bera sig að í hinum ýmsu æfingum.

TABATA/HIIT-þjálfun:

Endurhleðsla er mikilvæg!

TABATA og High Intensity Interval Training (HIIT) eru með þeim vinsælustu hóptímum í heiminum í dag. Til þess að fá sem mestan ávinning þjálfunar í hóptímanum þá mæli ég með að iðkandinn taki virkilega vel á því í lotuþjálfuninni sem samanstendur af 20 sek hámarksákefð – 10 sekúndur í hvíld og endurteknig á lotum eru allt að 8 sinnum. Með því móti þá aukum við hitaeiningabrennslu og eftirbruni verður að lokinni æfingu. Endurhleðsla eftir TABATA og HIIT þjálfun er mjög mikilvæg. Líkaminn jafnar sig í hvíldinni og þjálfunin skilar með því móti mestum ávinningi til iðkandans.

Hjólatímar (Spinning):

Varist að vera í of stuttum buxum!

Hver kannast ekki við að vera í stútfullum hjólatíma og fá hjól fyrir aftan gaurinn í styttstu stuttbuxunum? Það getur verið frekar óþægilegt að vera vitni að því. Með því að klæðast of stuttum buxum í hjólatíma getur leitt til sýkingar á viðkvæmu svæði og bakteríur geta verið á hnakknum sem orsaka húðbólgur. Almennt hreinlæti er mjög mikilvægt í hóptímum og því mæli ég með að best er að vera í hjólabuxum í hjólatímum.

Styrktarþjálfun (ButtLift/Vaxtarmótun):

Notið réttar þyngdir!

Bæði byrjendur og þeir sem hafa lengi stundað hóptíma eru meðvitaðir um að nota réttar þyngdir í hóptímum. Það er ekki samasem merki að nota þyngstu handlóðin og ná árangri. Með því að nota of þung handlóð eða lóðastangir í tímum þá getur það leitt til rangrar líkamsbeitingar, álagseinkenna og meiðsla. Finnið ykkar rétta líkamstakt og jafnvægi við að stunda lyftingar og haldið ykkur við að nota þá þyngd sem þið ráðið við.

Fit Pilates:

Þjálfar vel kvið, bak, innri- og ytri lærisvöðva! 

Kviður og bak gegnir mikilvægu hlutverki í líkamsstöðu okkar í daglegu lífi. Í Fit Pilates þjálfum við kvið og bakvöðvana. Til að fá sem mest út úr hóptímanum þá er nauðsynlegt að þjálfa einnig vel innri- og ytri lærisvöðva, rassvöðvann, neðra bak og þindina. Í Fit Pilates er fyrst og fremst verið að vinna með innri jafnvægisvöðvana í Kjarnanum. Innri jafnvægis vöðvarnar eru þeir vöðvar sem passa upp á hrygginn og eru grunnurinn fyrir allar hreyfingar. Nefnist ýmsum nöfnum „innra vöðvahúsið“ , djúpvöðvar, kjarnavöðvarnir, Powerhouse eða Core á ensku. En auk þess þjálfum við stóru vöðvana í kvið og baki, læri, rassvöðva, styrkjum mjaðmir, hendur og axlir. Nákvæmni í hreyfingum í Fit Pilates er lykillinn á að við náum árangri.

Zumba:

Hita vel upp allan líkamann og njóta!

Zumba er eitt vinsælasta líkamsræktarkerfið í heiminum í dag. Hver elskar ekki að dansa og styrkja vel allan líkamann um leið? Mikilvægt atriði er að hita vel og klára allar hreyfingar í hóptímanum. Í Zumba þá brennir þú mikið af hitaeiningum og með því að vera meðvitaður um að klára hreyfingarnar þá verður þjálfunin enn áhrifaríkari fyrir þig og þú munt sjá meiri árangur.