Rosling varpaði ljósi á heilsu fólks víða um heim

Sænski fræðimaðurinn Hans Rosling hélt fyrirlestur í Hörpunni þann 15. september síðastliðinn þar sem hann varpaði ljósi á heilsu fólks víða um heim og margvíslega áhrifaþætti hennar.

Rosling gerði það með því að beita heillandi framsetningu á tölulegum gögnum með gagnvirkri og áhrifamikilli sjónrænni grafík sem byggir á Gapminder, forriti sem hann þróaði sjálfur.

Fyrirlestur Rosling í Hörpunni hefur nú verið gerður aðgengilegur á netinu og má sjá hér að neðan.

Rosling er læknir og prófessor í alþjóðaheilbrigðisvísindum við Karolinska institutet í Stokkhólmi, en hann kom hingað til lands á vegum félagsins Afríka 20:20 í samstarfi við Þróunarsamvinnustofnun Íslands (ÞSSÍ) og Embætti landlæknis.

Rosling er mjög eftirsóttur fyrirlesari og fjallar eitt frægasta kvikmyndabrot hans um þróun heimsins í tvær aldir hjá tvö hundruð þjóðum, en það er gert á fjórum mínútum. Árið 2012 var Hans Rosling á lista TIME tímaritsins yfir 100 áhrifamestu einstaklinga í heiminum.