„Búin að leita af okkur allan grun“

Uppi eru getgátur um að um gabb hafi verið að ræða þegar neyðarkall barst frá sökkvandi báti á Faxaflóa í gær. Ítarleg leit úr lofti og af sjó bar ekki árangur, og sáust engin ummerki og engan bát vantaði inn í sjálfvirkt kerfi Tilkynningaskyldunnar.

„Við vorum með þyrlu í loftinu í klukkustund í dag og sú leit bar ekki árangur,“ segir Auðunn Kristinsson, verkefnastjóri á aðgerðasviði LHG.

„Það lítur út fyrir að útkallið hafi ekki verið á rökum reist, hugsanlega gabb eða einhver hrekkur. Við erum búin að leita af okkur allan grun. Það er ekkert sem bendir til þess að það hafi verið um raunverulega neyð að ræða,“ segir Auðunn.

Nánar verður fjallað um málið í kvöldfréttum Stöðvar 2 klukkan 18:30.