Boðið aðalhlutverkið í True Detective

Sjónvarpsstöðin HBO er búin að bjóða leikkonunni Rachel McAdams aðalkvenhlutverkið í sjónvarpsþættinum True Detective. Þetta herma heimildir Variety.

Ef Rachel þiggur hlutverkið leikur hún á móti Vince Vaughn og Colin Farrell sem HBO er búið að staðfesta að leiki aðalhlutverkin. Talið er líklegt að Taylor Kitsch hreppi einnig hlutverk í seríunni.

Fyrsta sería af True Detective var sýnd fyrr á árinu en þá voru það Matthew McConaughey og Woody Harrelson sem fóru með aðalhlutverkin. Þeir snúa ekki aftur í seríu tvö.

Önnur sería gerist í Kaliforníu og leikstýrir Justin Lin tveimur fyrstu þáttunum.