Dauðhrædd og hágrátandi eftir að vagnstjóri tók af henni mynd

Strætisvagnabílstjóri fékk áminningu eftir að hann tók ljósmynd af 14 ára stúlku í vagninum sem hann segist hafa talið ekki vera með gildan strætómiða. Hann var leystur frá störfum tímabundið á meðan málið var rannsakað en sneri síðan aftur til starfa. Móðir stúlkunnar segist mjög ósátt við þau svör sem hún hefur fengið frá Strætó bs.

„Ég er bara búin að fá nóg,“ segir Jóna Björg, móðir stúlkunnar. „Dóttir mín kemst ítrekað ekki leiðar sinnar og frelsissviptingin heldur áfram. Í tvígang hafa yfirmenn Strætó talið sig hafa útkljáð þetta mál. Siðferðiskennd þeirra er greinilega ekki á háu plani þegar börn eiga í hlut.“

Hjá sálfræðingi vegna atviksins

Jóna segir vagnstjórann hafa frelsissvipt dóttur sína með því að neita að opna aftari dyr vagnsins þegar hún ætlaði út. Hann hafi tekið upp myndavél, sagt henni að koma til sín og smellt af henni mynd. Að því loknu hafi dóttirin hlaupið út um fremri dyr vagnsins sem hafi verið opnar. Jóna segir dóttur sína haldna miklum kvíða eftir atvikið og að hún þurfi að fara til sálfræðings vegna þess.

„Áður en þetta gerðist var hann búinn að vera að kommenta á útlit hennar, segja henni hvað hún væri hugguleg og myndarleg stúlka. Þegar hún kom svo heim þetta kvöld var hún dauðhrædd og hágrátandi, spyrjandi sjálfa sig hvað hann ætlaði að gera, hvort hann ætlaði að keyra eitthvert með hana og gera henni eitthvað.“

Íhugar að lögsækja Strætó

Atvikið átti sér stað í Kópavogi í nóvember á síðasta ári og sama kvöld hafði Jóna samband við Strætó. Daginn eftir fóru mæðgurnar til lögreglu þar sem skýrsla var tekin af dótturinni.

„Strætó álítur að þar sem hann hafi ekki meitt hana líkamlega þá fái hann að halda starfinu. Ég er búin að reyna að vinna með Strætó til þess að þessum manni verði vikið af leið. Dóttir mín þorir ekki að stíga upp í vagninn þegar hann er að keyra og hann hefur ekki séð sóma sinn í að biðjast afsökunar og biðja sjálfur um að víkja.“

Jóna segir bekkjarsystur dóttur sinnar einnig hafa lent í manninum, og eflaust fleiri börn. Hún segist vera að íhuga að lögsækja Strætó bs.

Ljóst að vagnstjórinn braut af sér í starfi

Kolbeinn Óttarsson Proppé, upplýsingafulltrúi Strætó bs., segir að Strætó harmi málið. Vagnstjórinn hafi verið leystur frá störfum, í samráði við akstursaðilann, á meðan málið var rannsakað. Skýrsla hafi verið tekin af vagnstjóranum, auk þess sem rætt hafi verið við yfirmann hans, talað við lögreglu og ráða leitað hjá lögmanni.

„Það er ljóst að vagnstjórinn braut af sér í starfi með því að taka mynd af stúlkunni og skiptir þá engu að hann telji sig hafa verið að afla sönnunargagna um að hún væri að svindla sér inn með barnamiðum. Vagnstjórinn hefur fengið áminningu.“

Kolbeinn segir að Strætó telji, í samráði við akstursaðilann sem viðkomandi vagnstjóri vinnur hjá, sér ekki stætt á því að aðhafast frekar í málinu.