Minni völd í héraði með nýjum lögum

Þegar þing kemur saman í haust mun Ragnheiður Elín Árnadóttir, iðnaðar- og viðskiptaráðherra, leggja fram frumvarp um breytingu á raforkulögum. Í frumvarpinu verður með ítarlegum hætti kveðið á um hvernig standa skuli að gerð áætlunar um uppbyggingu flutningskerfis raforku. Í þessum drögum, sem eru opinber á heimasíðu ráðuneytisins, er sveitarfélögum skylt að samræma skipulagsáætlanir sínar vegna verkefna í kerfisáætlun. Sveitarfélögum ber einnig að tryggja að skipulagsmál hindri ekki framgang þeirra verkefna sem eru í staðfestri þriggja ára framkvæmdaáætlun.

Halldór Halldórsson, formaður Sambands íslenskra sveitarfélaga, telur vanta ríkt samráð við sveitarfélögin hvað þetta varðar. „Ég get lítið tjáð mig um málið á þessu stigi en maður leyfir sér að hugsa upphátt þegar þetta ber á góma og velta fyrir sér hvort ekki þurfi á einhvern hátt að skoða heildarmyndina betur. Við þurfum að velta því upp hvort skipulagið milli ríkis og sveitarfélaga sé komið á leiðarenda og við þurfum að hugsa hlutina upp á nýtt.“

Guðmundur Ingi Ásmundsson, aðstoðarforstjóri Landsnets, segir tilganginn með þessum nýju lögum vera þann að auka þetta samráð við sveitarfélög.

„Tilgangurinn er ekki sá að slá vopn úr höndum sveitarfélaga. Tilgangurinn er að ná sátt um niðurstöður kerfisáætlunar og að hafa ríkt samráð við hagsmunaaðila. Það sem er verið að leiða í lög með frumvarpi ráðherra er að færa samráðið framar í ferlinu og að þeir sem við þurfum að hafa samráð við komi strax að borðinu á fyrstu stigum þess. Eins og staðan er núna er ferlið á þá leið að hagsmunaaðilar koma of seint að borðinu, eða þegar framkvæmdaleyfi á að gefa út. Það er okkar von að nú verði verklag skýrara og gegnsærra og að meiri sátt ríki um framkvæmdir.“

Guðmundur telur að sveitarfélögin séu ekki að missa skipulagsvald sitt þegar kemur að raflínum. „Þau setja enn þá raflínur á sitt skipulag. Markmiðið er að kerfisáætlunin fái traustan grundvöll sem er nauðsynlegt fyrir áætlun sem lýtur að mikilvægum grunnkerfum landsins,“ segir Guðmundur Ingi.

Frumvarpið er nú í umsagnarferli og óskað er eftir að umsagnir berist fyrir 20. ágúst.