Grísk tónagleði leiðarstef

Evrópustofa blæs til hátíðartónleika í Eldborgarsal Hörpu í dag í tilefni Evrópudagsins 2014. Þar verður grísk tónlist í forgrunni, flutt af Caput-hópnum, í fylgd Geoffrey Douglas Madge og Þóru Einarsdóttur, sem og af grísku rebetiko-hljómsveitinni Pringipessa Orchestra.

„Leiðarstef tónleikanna verður grísk tónagleði en Grikkland fer með formennsku í ráðherraráði Evrópusambandsins um þessar mundir. Caput-hópurinn ríður á vaðið fyrir hlé með mögnuðum verkum eftir gríska tónskáldið Nikos Skalkottas og útfærslum Maurice Ravel á grískum þjóðlögum. Caput-hópurinn verður ekki einn á ferð en með honum koma fram hinn heimsþekkti ástralski píanóleikari Geoffrey Douglas Madge ásamt hinni ástsælu íslensku sópransöngkonu Þóru Einarsdóttur,“ segir Dóra Magnúsdóttir hjá Evrópustofu.

Eftir hlé stígur gríska hljómsveitin Pringipessa Orchestra á svið og leikur rebetiko-lög eftir þjóðlagaskáldið og bouzouki-spilarann Vasílis Tsitsánis.

* Tónleikarnir hefjast klukkan 20.00

* Kynnir er Örn Árnason

* Aðgangur ókeypis

* Panta þarf miða á midi.is

* Veitingastaðurinn Munnharpan í Hörpu býður uppá gríska rétti í tilefni dagsins