Frosti Jay fær styrk frá lögreglunni

Landssamband lögreglumanna hefur fært Frosta Jay Freeman og fjölskyldu hans styrk úr Líknar- og hjálparsjóði Landssambandsins. Í tilkynningu er styrkurinn sagður veglegur.

Frosti er sjö ára og er með sjálfgæfan erfðasjúkdóm sem nefnist Ataxia telangiectasia. Hann er þriðji Íslendingurinn sem greinist með sjúkdóminn, sem leggst meðal annars á taugakerfi og ónæmiskerfi líkamans. Frosti notast að hluta til við hjólastól.

Líknar- og hjálparsjóður Landssambands lögreglumanna var stofnaður árið 1992 og hafa samtals á annað hundrað aðilar, bæði einstaklingar og ýmis samtök, notið góðs af. Hægt er að fylgjast með baráttu Frosta við sjúkdóminn á Facebook-síðunni „Áfram Frosti Jay Freeman.“