Gera þátt um lögreglugrimmd

Næsti þáttur Black Dynamite sem sýndur verður á kvöldstöð Cartoon Network, Adult Swim, í byrjun 2015 mun fjalla um lögreglugrimmd í Bandaríkjunum. Tónlistarmennirnir Erykah Badu og Tyler, The Creator verða sérstakir gestir í þættinum.

Black Dynamite eru teiknimyndaþættir byggðir á samnefndri grínmynd frá 2009 sem eru innblásnir af „blaxploitation“ kvikmyndum áttunda áratugarins en þátturinn sem um ræðir heitir Wizard of Watts. Í þættinum flækist titilpersónan Black Dynamite í óeirðir milli almennings og lögreglu.

„Sem grínhöfundur tel ég starf mitt vera að fá fólk til að hlæja og á sama tíma nota uppbyggilega samfélagsrýni til þess að fá fólk til að hugsa og hvetja til umræðna,“ segir Carl Jones, sem skrifaði handritið.