Fékk draumaveðrið í tónlistarmyndbandið

„Við fengum akkúrat það veður sem við vildum fá í myndbandið okkar, fallegan byl og storm,“ segir tónlistarmaðurinn Ragnar Zolberg. Hann og félagi hans úr sænsku hljómsveitinni Pain of Salvation, Daniel Gildenlöw, komu hingað til lands fyrir skömmu til að taka upp tónlistarmyndband.

Það er við lagið Falling Home, sem er jafnframt titillag nýjustu plötu sveitarinnar. „Þetta er fyrsta lagið sem ég er með í að semja með bandinu. Daníel kom bara einn því við erum bara tveir í þessu lagi, það er svona „acoustic“ og rólegt,“ segir Ragnar.

Myndbandið er tekið upp í Elliðaárdalnum og sá Hilmir Berg Ragnarsson um upptökurnar. „Við gerðum þetta líka sérlega íslenskt með því að vera með skartgripi frá Sign og klæðast feldi frá Eggerti feldskera.“

Þetta er í annað skiptið sem Daníel kemur til Íslands en hann kom síðast fyrir tólf árum með bandið sitt til að spila á Kaffi Reykjavík. Hann og sveitin hans þurfti þó að hætta við þar sem það var búið að tvíbóka staðinn. „Geir Ólafs var einnig bókaður og hann neitaði að gefa frá sér sitt „spott“. Þannig að þeir gátu ekki spilað giggið sitt, sem er frekar fyndið,“ segir Ragnar og hlær.

Hann spilar á gítar í hljómsveitinni og er einnig farinn að syngja mikið. „Ég leysti Daníel af og var aðalsöngvari sveitarinnar þegar hann veiktist á sínum tíma. Eftir það er ég farinn að syngja meira.“

Ragnar segir það alltaf jafn gaman að koma heim en hann býr í Noregi, í sveitinni skammt frá Ósló og kann vel við sig þar. „Það er alltaf jafn gott að koma heim en samt alltaf jafnlítið frí því maður er alltaf að gera eitthvað. Það er samt algjör lúxus að fá að koma heim,“ bætir söngvarinn við.

Hann hefur haft í nógu að snúast undanfarið og er meðal annars að koma úr fimm vikna löngu tónleikaferðalagi um Bandaríkin með Pain of Salvations. „Við erum að semja fyrir næstu plötu og svo er ég einnig að semja lög með mjög þekktum pródúsent fyrir heimsfrægt þungarokksband, en það er leyndarmál hvaða band það er, vegna samningaviðræðna,“ útskýrir Ragnar. Þá er hann einnig að vinna að annarri sólóplötu. 

Hann er ekki viss hvar hann ætli að halda sig um jólin. „Ég er mikið jólabarn en veit ekki alveg hvort ég verð hér um jólin eða úti. Þetta hefur verið svo annasamt haust að ég get ekki tekið ákvörðun strax,“ segir Ragnar léttur í lundu.