Iðkendur koma til að vera

Dans- og listasmiðjan Kramhúsið fagnar 30 ára afmæli í ár. Af því tilefni var ákveðið að skrásetja sögu hússins og kom bókin Kramhúsið – orkustöð i miðbænum út fyrir skemmstu. Árleg jólagleði Kramhússins verður haldin í Tjarnarbíói í dag en auk þess hefur verið ákveðið að teygja á afmælisárinu og halda yfirlitssýningu í febrúar á næsta ári.



Brynhildur Björnsdóttir, sem skrásetur söguna,  hefur verið viðloðandi húsið frá unglingsaldri. „Ég tók mér hlé í um áratug en byrjaði svo af fullum krafti í byrjun árs 2009, ómöguleg í baki og öll í steik. Það er skemmst frá því að segja að leikfimin í Kramhúsinu læknaði mig en þetta var í fyrsta skipti sem ég prófaði leikfimi hjá stofnandanum, Hafdísi Árnadóttur. Tímarnir hjá henni eru engu líkir. Hún blandar saman ballett, jóga, pilates, tai chi, rúmbu, samba, tangó, cha cha cha og einhverri tækni sem hún ein kann og er ótrúlega góð fyrir allt mögulegt,“ útskýrir Brynhildur.

Varð að segja sögu hússins

Hafdís er íþróttakennari í grunninn og kenndi lengi vel við leiklistaskólann. „Henni fannst íþróttir svo leiðinlegar að hún byrjaði að kynna sér alls konar dans og hefur hann fengið að blómstra í Kramhúsinu í gegnum tíðina,“ segir Brynhildur. Tímarnir sem Brynhildur hefur sótt eru fyrir konur á öllum aldri og gerir hver eins og hún getur. „Svo er Hafdís alltaf að segja okkur sögur og mér fannst að einhver ætti að skrásetja þær. Þegar kom í ljós í fyrra að stórafmæli stæði fyrir dyrum ákvað ég að láta til skarar skríða.“

Fólk kemur til að njóta stundarinnar

Brynhildur segir mikið frumkvöðlastarf hafa verið unnið í Kramhúsinu og hefur Hafdís lagt sig fram um að kynna hina ýmsu dans- og hreyfilist fyrir landsmönnum. „Um tíma kom varla sá útlendingur til Íslands, sem kunni eitthvað í dansi, að hann væri ekki farinn að kenna í Kramhúsinu.“ Hún segir sérstöðu hússins margvíslega. „Þótt fólk sé hingað komið til að stunda líkamsrækt þá fer hér fram gríðarlegt grasrótarstarf á sviði danslistar og annarrar listsköpunar auk þess sem hér hefur ávallt verið unnið öflugt barnastarf. Þessu fannst mér þurfa að gera skil. Það sem mér finnst þó allra best er að fólk kemur hingað til að vera en ekki til að verða; mjórri, sterkari eða hvað það nú er, þó það gerist auðvitað samhliða. Það kemur til að njóta stundarinnar og njóta sín.”

Bókin er að sögn Brynhildar byggð þannig upp að fyrst er farið yfir sögu Hafdísar og sögu hússins. „Síðan eru þarna viðtöl við fulltrúa þess helsta í húsinu, tangósins, afrósins, leikfiminnar, jógans, leiklistarinnar og barnastarfsins. Megnið af sögunni hefur hingað til verið í munnlegri geymd en auk þess segir ógrynni ljósmynda sína sögu. Ljósmyndarinn Spessi er myndritstjóri bókarinnar. Hann hefur bæði tekið myndir og valið úr fjölda mynda sem hinir ýmsu ljósmyndarar hafa tekið í Kramhúsinu í gegnum tíðina. Þá hefur Tómas Jónsson, grafískur hönnuður, lagt sitt af mörkum til bókarinnar en hann hefur séð um frumlegar og skemmtilegar auglýsingar fyrir Kramhúsið frá upphafi.



Uppskera vetrarins

Í dag verður hin árlega jólagleði Kramhússins haldin í Tjarnarbíói. Þar fá áhorfendur að sjá uppskeru vetrarins hjá iðkendum. Fjölbreytnin er gríðarleg og þykir sýningin hin allra mesta skemmtun. Hjá sumum er hún órjúfanlegur hluti aðventunnar. „Þarna verða Bollywood-dansar, magadansar, afródansar, hip hop, breik, afró, balkandansar og hinir ýmsu gjörningar,“ segir Brynhildur. Barnasýningin hefst klukkan 14 og fullorðinssýningin klukkan 20.