Tónlistin er tungumál músíkmeðferðarinnar

„Það sem gerir músíkmeðferðina svo einstaka er að í gegnum hvaða tónlist sem er túlkum við svo margt mannlegt sem ekki er hægt að túlka annars staðar,“ segir Sara Hrund Signýjardóttir músíkmeðferðarfræðingur. Í dag, 15. nóvember, er Evrópudagur músíkmeðferðarfræðinga haldinn hátíðlegur.

„Músíkmeðferðarfræði er skipulögð notkun tóna, hljóða og hreyfinga sem veitt er til þess að auka vellíðan. Tónlistin verður að tungumáli í meðferðinni, og hún notuð sem tæki til þess að tala saman eða tjá tilfinningar og deila reynslu og hjálpa skjólstæðingnum að finna út úr sínum tilfinningum,“ segir Sara.

Starf músíkmeðferðarfræðinga gengur síðan út á að lesa í tónlistina og skynja, rétt eins og sálfræðingar. Sara segir að einn stærsti misskilningur fólks sé að það þurfi að vera músíkalskt til þess að notfæra sér þessa meðferð, því þetta snúist engan veginn um það, heldur snúist þetta um túlkunina.

„Þetta er í raun fyrir alla en metið er hvort þetta sé það sem hentar skjólstæðingnum. Þeim sem eiga í vandræðum með að koma hlutunum í orð finnst gott að nota tónlistina til þess að heyra eigin tjáningu á hljóðfæri. Vandamálið er rætt, skjólstæðingurinn prófar og þreifar sig áfram að túlka tilfinninguna á hljóðfæri. Enginn tími er eins, þetta er svo aðlögunarhæf meðferð því tónlist hefur engin landamæri.“

Meðferðin hefur sýnt mjög marktækan og jákvæðan árangur, til dæmis á samskiptamynstur einhverfra, hjá öldruðum og börnum með þroskaskerðingar. „Með börn eða fatlaða þá fara samskiptin bara fram í gegnum tónlist. Það er svo merkilegt þegar fólk kemur inn í músíkmeðferð og þekkir ekkert til hljóðfæra að þá finnur það leið til þess að tjá sig,“ segir hún.

Í dag kynna þau meðferðina og starfið fyrir áhugasömum. „Þetta verður almenn kynning á meðferðinni og starfinu okkar. Við erum átta í félaginu hér heima sem við vitum af. Þessi meðferð hefur verið í boði hér á landi í mörg ár, en starfsheitið sem slíkt hefur ekki hlotið löggildingu. Það er okkar helsta baráttumál og löggildingin er mjög mikilvæg fyrir okkur sem fagaðila.“

Músíkmeðferðarfræðingar taka á móti gestum að Stórhöfða 23 í dag frá kl. 17-19.