Skipulagði smygl innan úr fangelsinu

Fangi á Kvíabryggju var handtekinn af lögreglu í lok síðasta mánaðar vegna gruns um aðild að skipulagningu, fjármögnun og innflutningi á fíkniefnum til landsins.

Alls voru fjórir karlmenn handteknir og settir í gæsluvarðhald í tengslum við málið.

Handtakan var þáttur í umfangsmiklum aðgerðum lögreglu sem lagði hald á um hálft kíló af amfetamíni við rannsókn, en við húsleit var einnig lagt hald á MDMA, stera og umtalsverða peningafjárhæð sem er talin vera til komin vegna fíkniefnasölu.

Fangar á Kvíabryggju hafa aðgang að interneti og er frjálst að hafa farsíma sem þeir þurfa þó að skila til fangavarða fyrir nóttina.

Tugur manna var yfirheyrður vegna málsins sem telst nú upplýst.

Maðurinn sem er 27 ára gamall á sakaferil sem nær aftur til 2003 og hefur ítrekað komið áður við sögu lögreglu. Hann var að taka út dóm fyrir fíkniefna-, vopna- og umferðarbrot á Kvíabryggju þegar lögreglan handtók hann vegna brotanna.

Friðrik Smári Björgvinsson yfirlögregluþjónn segir ekkert einsdæmi að fangi sé tekinn við glæpsamlegt athæfi innan fangelsismúra og að slík brot séu alltaf litin alvarlegum augum.

Páll Winkel fangelsismálastjóri segir að það komi fyrir annað slagið að fangar verði uppvísir að lögbrotum innan fangelsisins. Slíkt hafi áhrif á framgang í refsivistinni. Fangar sem brjóta af sér eru ýmist settir í gæsluvarðhald eða lokað fangelsi og missi öll fríðindi. „Þetta hefur auðvitað áhrif á framgang í refsivistinni. Þetta hefur áhrif á dagleyfi, reynslulausn, vistunarstað og svo framvegis. Ef upp koma grunsemdir um að fangi sé að gera eitthvað af sér fara þær upplýsingar beinustu leið til lögreglu og við gerum þá okkar besta til að aðstoða lögreglu við að upplýsa brot,“ segir Páll.