Tveggja tíma spuni

,,Leikhússpuni er alltaf jafn spennandi, maður labbar inn og veit ekkert hvers konar tónlist og hreyfingar fæðast,“ segir Auðunn Lúthersson, nemi í djassdeild FÍH, sem ásamt Þórdísi Björk Þorfinnsdóttur stofnaði raftónlistardúettinn Himbrim á dögunum. Þau hafa í samstarfi við Hrefnu Lind Lárusdóttur staðið fyrir æfingum í Tjarnarbíói þar sem dúettinn spinnur tónlist og hópur sviðslistamanna endurómar hana með líkamstjáningu – eða öfugt.

Þótt Þórdís Björk verði fjarri góðu gamni hyggst Auðunn halda uppi merkjum dúettsins í tveggja tíma samfelldum miðnæturspuna í Tjarnarbíói í kvöld. „Hrefna Lind fer fremst í flokki dansaranna og var helsta driffjöðrin í æfingunum í sumar. Hún stundar nám í leikrænni líkamstjáningu, physical theater, í háskóla í Colorado eins og Halldóra Mark, sem einnig verður með í miðnæturspunanum auk fleiri listamanna,“ segir Auðunn og útskýrir sinn þátt í spunanum.

„Ég spila eigin tónlist á tölvuna mína, sem ég er áður búinn að forrita, t.d. með gítarstefjum, jafnvel söng, og get um leið unnið tónlistina og átt við hana eins og hentar spunanum. Stundum er tónlistin róleg, stundum algjörlega geðveik, allt eftir því hvert spuninn leiðir mig. Í stuttu máli er verkið samspil tónlistar og hreyfingar.“

Auðunn segir miklar tilfinningar og dýnamík í spilinu sem og, eðli málsins samkvæmt, í líkamstjáningu sviðslistamannanna. Hann notar yfirleitt ekki aftur tónlistina úr spunanum en viðurkennir að hún verði sér stundum uppspretta hugmynda. „Spunatónlistin er í raun einnota, hún fæðist í augnablikinu og er skemmtilegust á því augnabliki,“ segir hann.

Þórdís Björk er ein af Reykjavíkurdætrum og segir Auðunn að tildrög þess að þau tvö stilltu saman strengi megi rekja til þess að hann samdi undirspil við rapp og söng þeirra Borgardætra.

„Svo fattaði ég hvað Dísa er frábær söngkona og í kjölfarið fórum við að vinna saman.“ Dúettinn hefur nokkrum sinnum komið fram, t.d. á tónlistarhátíðinni Gærunni á Sauðárkróki. „Við höfum gefið út tvö tónlistarmyndbönd, Running in Circle og Thinking about You, og erum að hugleiða frekari útgáfu. Við erum þó lítið að pæla í plötuútgáfu, platan er dauð, aðalfókusinn er að vinna að skemmtilegu myndefni, tengja það við tónlistina og koma á YouTube.“

All Change-sviðslistahátíðinni

Miðnæturspuninn er hluti af All Change-sviðslistahátíðinni. All Change-hátíðin er samstarfsverkefni Reykjavíkur Bókmenntaborgar UNESCO, Tjarnarbíós og Vinnslunnar og tengist dagskráin Lestrarhátíð Reykjavíkur. Hátíðin, sem er haldin 4. og 5. október í fimm borgum; Reykjavík, London, Augsburg, New York og New Orleans, byggir á alþjóðlegu samstarfi leikhúslistamanna og er hluti af bresku hátíðinni Fun Palaces.