Fékk leyfi hjá biskupnum

„Ég er frekar stressuð því það getur svo margt farið úrskeiðis en við erum með A-, B-, C- og D-plan og samstillt úr,“ segir dansarinn Sigríður Soffía Níelsdóttir sem ber mikla ábyrgð í kvöld þegar verk hennar Töfrar verður frumflutt af flugeldum, dönsurum og 32 kirkjum víðs vegar um landið á slaginu 23 í kvöld.

Þetta er annað sinn sem Sigríður sér um þessa lokasýningu á Menningarnótt en það er í mörg horn á líta þegar maður er að stjórna dönsurum, flugeldum og kirkjuklukkum á sama tíma.

„Ég leitaði innblásturs í þjóðsögur þar sem kirkjur og kirkjuklukkur leika stórt hlutverk. Þar er kirkjuklukkum til dæmis yfirleitt hringt til bjarga málunum og verja mannskapinn fyrir til dæmis eldgosum. Við erum að leggja okkar af mörkum ef það skyldi gjósa um helgina,“ segir Sigríður Soffía sem þurfti að fá leyfi hjá sjálfum biskupnum til að fá að hringja klukkum kirkna víðs vegar um landið.

„Þau hjá Biskupsstofu voru ánægð með framtakið og gáfu mér leyfi til að ræsa út yfir 30 hringjara sem verða tilbúnir á sínum stað í kvöld. Með því að hafa kirkjurnar á víð og dreif um landið er ég að færa verkið nær landsbyggðinni líka.“

Kvennastrengjasveit sér um að flytja verk Arvos Pärt, Cantus in Memoriam Benjamin Britten, undir atriðinu en það reyndist þrautin þyngri að fá nóturnar.

„Mig langaði mikið að spila þessa tónlist undir og er af snjallsímaskynslóðinni svo að ég hélt að ég gæti fengið nóturnar á pdf í símann á 10 mínutnum. En svoleiðis var það aldeilis ekki. Nóturnar eru geymdar í innsigluðum kassa hjá manni í Vínarborg sem okkur tókst að hafa upp á fyrir 10 dögum og fengum þær sendar með hraðpósti til landsins. Það eru strangar reglur sem fylgja þessum nótum og ég þarf, eftir að hljómsveitin er búin að spila, að safna öllu saman, innsigla kassann og senda út á ný.“

Sigríður hlakkar mjög til kvöldsins en sýningin byrjar sem fyrr segir klukkan 23 á bökkum gömlu hafnarinnar í miðborg Reykjavíkur. Þeir sem heima sitja geta fylgst með í beinni útsendingu í Ríkissjónvarpinu.