Jennifer Lawrence og Chris Martin nýtt par

Óskarsverðlaunaleikkonan Jennifer Lawrence og Chris Martin, forsprakki hljómsveitarinnar Coldplay, hafa verið að slá sér upp síðan í júní. Lawrence var áður með leikaranum Nicholas Hoult en þau hættu saman í vor, hann ku hins vegar vera að hitta Kristen Stewart.

Martin og Lawrence sáust fyrst spjalla saman í eftirpartý eftir Coldplay-tónleika í Royal Albert Hall í London og fór vel á með þeim. Hvorki Martin né Lawrence hafa tjáð sig um sögusagnirnar en flestir slúðurmiðlar vestanhafs hafa sagt frá þessu.

Martin skildi við leikkonuna Gwyneth Paltrow fyrr á þessu ári eftir tíu ára hjónaband en þau eiga tvö börn saman. Bæði hafa síðar komið fram í fjölmiðlum og sagst vera góðir vinir og eyði ennþá tíma saman sem fjölskylda.

Einnig eru uppi sögusagnir þess efnis að Paltrow sé komin með nýjan mann upp á arminn og er það GLEE-framleiðandinn Brad Falchuck sem er hinn heppni. Parið ku hafa kynnst þegar Paltrow tók að sér aukahlutverk í söngvaþáttunum vinsælu og hefur sést á rómantískum stefnumótum í Los Angeles undanfarið.