Nýir Sprotar í grínflóru íslenskra leikkvenna

Leikkonurnar Þórunn Arna Kristjánsdóttir, Salóme Rannveig Gunnarsdóttir og Thelma Marín Jónsdóttir koma nýjar inn í aðra þáttaröð Stelpnanna sem frumsýnd verður í haust á Stöð 2.

„Ég dýrkaði þættina þegar þeir byrjuðu,“ segir Þórunn Arna. „Maður leit alltaf rosalega upp til þessara leikkvenna.“

Engin þeirra hefur mikla reynslu af grín- eða sketsaleik og því hleypa þær ferskum andvara inn í þættina. Þær þurftu ekki langan umhugsunarfrest þegar þeim var boðið að taka þátt.

„Að fá tækifæri sem leikkona til að vinna með ótrúlega sterkum hópi leikkvenna með efni sem er samið alfarið af flottum konum. Þetta var „no-brainer“,“ segir Salóme. „Þau hringdu bara og ég sagði já,“ segir hún og hlær.

Thelma Marín er sammála þessu. „Þetta er alveg þvílíkt mikill „girl power“.“

„Þetta eru mín fyrstu spor í gríni. Ég kem mjög fersk inn í þetta,“ segir Thelma og bætir við að þetta sé þar að auki í fyrsta skipti sem hún leikur í sjónvarpi yfirhöfuð ef frá er talið hlutverk fyrir nokkrum árum í þættinum Tíma nornarinnar.

Þórunn hefur heldur ekki mikla reynslu af grínleik. „Þannig að þetta er svolítil áskorun fyrir mig. En ég held að það sé nauðsynlegt að blanda svolítið. Kómíkin lyftir manni upp.“ Hún er spennt fyrir því að fá að búa til marga mismunandi karaktera.

Leikkonurnar ungu fóru á sína fyrstu æfingu með hópnum í gær en engin þeirra var sérstaklega stressuð fyrir verkefninu. „Ég var bara mjög spennt,“ útskýrir Salóme. „Það þurfti að breyta tímasetningunum og fresta æfingum um einn dag. Mér fannst það mjög erfitt, að þurfa að bíða degi lengur.“

Thelma hefur leikgleðina að leiðarljósi. „Ég hef verið að lesa skagfirskar skemmtivísur til að koma mér í gírinn. Ég get slegið um mig með skagfirsku gríni,“ segir hún hlæjandi.

Stelpurnar eru framleiddar af Saga Film og handritshöfundar eru þær Brynhildur Guðjónsdóttir, María Reyndal, Katla Margrét Þorgeirsdóttir, Ilmur Kristjánsdóttir og Maríanna Clara Lúthersdóttir.