Ráðuneyti segir Hafnarfjarðabæ ekki eiga forkaupsrétt að kvóta

Atvinnuvegaráðuneytið segir ráðherra ekki geta stöðvað sölu Stálskipa á aflaheimildum frystitogarans Þórs HF-4 frá Hafnarfirði.

Stálskip tilkynntu í lok janúar síðastliðins að Þór HF-4 hefði verið seldur til Rússlands. Sama dag óskaði fyrirtækið eftir því hjá Fiskistofu að aflaheimildir Þórs yrðu fluttar yfir á fimm önnur skip í eigu fjögurra útgerðarfélaga sem öll starfa utan Hafnarfjarðar.

Bærinn telur kvótann geta þýtt 65 störf

Aflaheimildirnar af Þór töldust vera yfir helmingur alls fiskveiðikvóta sem tilheyrði fyrirtækjum eða eigendum með heimilisfesti í Hafnarfirði. Bæjaryfirvöld töldu bæinn eiga forkaupsrétt sem honum hefði ekki verið gefið færi á að nýta. Í erindi Hafnarfjarðarbæjar til atvinnuvegaráðuneytisins vegna málsins var vísað til þess að Fiskistofa hefði hvorki tilkynnt bæjarfélaginu né ráðuneytinu um söluna á skipinu og kvótanum.

Við meðferð málsins hjá ráðuneytinu kom fram að Hafnarfjörður taldi hvarf kvótans úr bænum hafa verulega neikvæð áhrif í atvinnu- og byggðalegu tilliti. Var það rökstutt með því að yrði kvóti Þórs nýttur af einu línuveiðiskipi og þremur til fjórum minni bátum myndi það veita um 65 manns atvinnu. Ráðuneytið hafnar þessu.

Átta starfsmenn úr 26 þúsund manna bæ

„Þar sem sveitarfélagið stundar ekki útgerð fiskiskipa hefur Hafnarfjarðarkaupstaður ekki forræði á fyrirkomulagi eða formi þeirra veiða, sem mögulega yrðu stundaðar á grundvelli umræddra aflaheilda Þórs HF-4,“ segir ráðuneytið sem telur að meta eigi neikvæðu áhrifin af sölunni fyrir Hafnarfjörð miðað við áhrifin sem útgerð Þórs HF-4 hafi í raun haft í bænum. Þór hafi verið frystitogari og aflinn ekki unninn í landi. Af 37 manna áhöfn hafi aðeins átta verið búsettir í Hafnarfirði þar sem íbúafjöldinn sé 26 þúsund manns.

„Ef þannig er gert ráð fyrir mestu mögulegri fækkun starfa eða fækkun íbúa í sveitarfélaginu vegna uppsagnar áhafnarinnar og framsals aflaheimilda skipsins úr sveitarfélaginu verða áhrifin óveruleg,“ segir ráðuneytið sem kveður forkaupsréttarákvæði þar með ekki uppfyllt.

Bæjarráð Hafnarfjarðar lýsti vonbrigðum með að ráðherra „telji ekki skilyrði til að hlutast til um ráðstöfun aflaheimilda úr sveitarfélaginu“. Bærinn hyggst stefna Stálskipum og fól lögmanni sínum að vinna áfram að málinu.