Kenneth Máni setur upp einleik

Leikarinn Björn Thors vinnur nú að því að setja upp einleik sem persónan Kenneth Máni í samstarfi við Borgarleikhúsið. Þetta staðfestir Björn í viðtali við Fréttablaðið.

„Það er ákveðið höfundateymi sem er búið að vera að hittast og tala um þetta allt saman,“ segir Björn. „Hvað verður úr þessu verður að koma í ljós.“

Aðdáendur Fangavaktarinnar hljóta flestir að fagna þessum fréttum en Kenneth var ein ástsælasta persóna þáttaraðarinnar samkvæmt netkosningu á Vísi á meðan þættirnir voru í sýningu.

Kenneth er ungur strákur sem meinar vel en auðvelt er að plata í innbrot á alls kyns forsendum og endar alltaf á því að vera sá sem situr í súpunni, einn í handjárnum inni í lögreglubíl á meðan allir hinir sleppa.