Markmið fiskiveiðilaga sögð orðin tóm ef stjórnvöld hjálpa ekki Djúpavogi

„Sveitarstjórn Djúpavogshrepps krefst þess að stjórnvöld grípi nú þegar til aðgerða svo afstýra megi meiriháttar bakslagi í veiðum og fiskvinnslu á Djúpavogi,“ segir í bókun sveitarstjórnarinnar vegna lokunar fiskvinnslu Vísis í þorpinu.

„Djúpavogshreppur hefur nú í annað sinn á fáum árum orðið fyrir miklu höggi í sjávarútvegi, en skemmst er að minnast brotthvarfs allrar uppsjávarvinnslu af svæðinu árið 2006 án nokkurrar leiðréttingar. Sveitarstjórn krefst þess af stjórnvöldum að nú þegar verði tryggðar sambærilegar aflaheimildir og fyrirsjáanlegt er að hverfi úr byggðarlaginu til að forða hruni í bolfiskvinnslu á Djúpavogi,“ segir sveitarstjórnin.

Þá kemur fram að ítrekað hafi verið reynt að fá stjórnarþingmenn kjördæmisins á fund. Nú á að reyna á að fá alla þingmenn kjördæmisins ásamt sjávarútvegsráðherra á fund sem fyrst.

„Ef stjórnvöld ganga ekki fram af meiri ábyrgð í málefnum Djúpavogshrepps er ljóst að markmið 1. greinar laga um stjórn fiskveiða til að tryggja trausta atvinnu og byggð í landinu eru orðin tóm.“