Geta ekki fyrirskipað hreinsun olíulóðar

„Úrskurðurinn er kominn og hann er ótvíræður,“ segir Ríkharður Friðriksson hjá Heilbrigðiseftirliti Suðurnesja um þá niðurstöðu úrskurðarnefndar umhverfis- og auðlindamála að ekki sé hægt að mæla fyrir um hreinsun á olíumengaðri lóð í Njarðvík.

Olíudreifing rak olíubirgðastöð við Hafnarbraut þar til 2001 að hún var lögð niður og olíutankar rifnir. Á árinu 2010 fékk fyrirtækið verkfræðistofu til að meta hversu menguð lóðin væri. Niðurstaða, að sögn Olíudreifingar, var sú að nauðsynlegt hafi verið að fjarlægja um 200 rúmmetra af jarðvegi og hafi síðan 330 rúmmetrar verið fjarlægðir.

Sextán grömm í hverju kílói

Heilbrigðiseftirlit Suðurnesja tók í lok nóvember 2011 jarðvegssýni úr Hafnarbrautarlóðinni og sendi þrjú sýni í greiningu á rannsóknarstofu Háskóla Íslands í lyfja- og eiturefnafræði. Niðurbrotin dísilolía í sýnunum reyndist vera 12,1 til 16,6 grömm á kíló.

Í reglugerð um meðferð úrgangs segir að olíumagn í jarðvegi megi ekki vera meira en 5 grömm á kíló – sem eru skilgreiningarmörk á óvirkum úrgangi. Með vísan í þessa reglugerð sendi Heilbrigðiseftirlitið Olíudreifingu bréf og sagði að fyrirtækið ætti að hreinsa lóðina betur.

Olíudreifing taldi reglugerðina um meðferð úrgangs hins vegar ekki eiga við um lóðina á Hafnarbraut 6 heldur ætti að vinna samkvæmt leiðbeiningum Hollustuverndar ríkisins um meðferð á olíumenguðum jarðvegi. Heilbrigðiseftirlitið hélt sig hins vegar við kröfuna um hreinsun lóðarinnar og benti á að samkvæmt leiðbeiningum Hollustuverndar ætti Olíudreifing að láta gera áhættumat.

Standa á gati

Í kæru til úrskurðarnefndarinnar segir Olíudreifing að ekki hafi verið um urðun úrgangs að ræða heldur hafi lóðin mengast vegna starfsemi fyrirtækisins.

Úrskurðarnefndin kveður Heilbrigðiseftirlitið ekki „styðjast við viðhlítandi lagaheimild“ og því sé ákvörðun þess felld úr gildi. Niðurstaðan er nú til skoðunar hjá Heilbrigðiseftirlitinu.

„Við stöndum á gati hér en miðað við þennan úrskurð held ég að við getum ekkert frekar gert,“ segir Ríkharður Friðriksson. Miðað við úrskurðinn sé ekki hægt að miða við áðurnefnt gildi í reglugerðinni um meðferð úrgangs. Ríkharður bendir á að yrði olíumengaði jarðvegurinn á Hafnarbraut grafinn upp þá mætti ekki urða hann á urðunarstað fyrir almennan úrgang.