Góð aðsókn teppir umferð

„Lögreglan kom hingað til að leysa úr umferðarteppunni,“ segir Gunnar Kristinn Björgvinsson, rekstrarstjóri í Skálafelli. „Aðsóknin var svo góð í Skálafelli í gær að umferð stíflaðist. Þegar fólk var að fara í burtu af svæðinu streymdi fólk enn að, þannig að lögreglan kom hingað til að stýra umferð,“ segir Gunnar. „Stemningin var samt gríðarlega góð í fjallinu,“ bætir hann við.

Fyrsti opnunardagurinn í Skálafelli var í gær. „Margir eru búnir að bíða spenntir eftir því lengi að komast á skíði. Veðrið var svakalega fallegt og færið gott. Svo var lokað í Bláfjöllum þannig að öll traffíkin kom hingað uppeftir.“ Gunnar segir að dagurinn hafi gengið slysalaust fyrir sig. „Það er fyrir öllu. Við getum því ekki annað en verið ánægð með daginn,“ segir Gunnar.