Reisa fjölbýlishús í Austurkór

Mikið af íbúðarhúsnæði er nú í byggingu í Austurkór í Kópavogi. Gísli Norðdahl, byggingafulltrúi Kópavogsbæjar, segir verkin ganga vel og að eftirspurn hafi verið eftir lóðum. Búast megi við að flest verkin klárist, annaðhvort á þessu ári eða því næsta.

„Verkin eru á misjöfnu stigi en ganga flest vel. Það er búið að úthluta öllum fjölbýlishúsalóðum og eru framkvæmdir hafnar á flestum þeirra. Einbýlishúsin verða mögulega lengur í framkvæmd þar sem það eru ekki bara verktakar sem standa að byggingu þeirra,“ segir Gísli og bætir við að enn séu lausar lóðir fyrir parhús og einbýlishús.