Emírinn í Dúbaí býður íslenskum víkingum á hátíð

Fólk Fimmtán íslenskum víkingum úr víkingafélaginu Rimmugýgi hefur verið boðið að taka þátt í 400 manna víkingahátíð sem haldin verður í Dúbaí í lok mars. Emírinn í Dúbaí greiðir ferðakostnað, uppihald og dagpeninga á meðan á hátíðinni stendur.

„Það eru mörg þúsund víkingar í Evrópu og víðar, og það er gríðarlega mikil eftirspurn eftir því að komast á þessa hátíð, svo það er frábært að fá svona mörg pláss,“ segir Hafsteinn Pétursson, jarl Rimmugýgjar.

Hann segir að hátt í 70 félagsmenn hafi óskað eftir því að fara til Dúbaí. „Við þurftum að fara í gegnum mjög hart forval til þess að velja álitlegustu kappana,“ segir Hafsteinn. „Við bjuggum til nokkurs konar fegurðarsamkeppni, ef svo má segja, þar sem nokkrir fengu sæti, og svo var dregið um afganginn af lausum sætum.“

Hafsteinn segir að sérstaklega hafi verið óskað eftir tónlistarfólki. Þess vegna séu tvær söngkonur í hópnum ásamt þrettán vönum bardagamönnum. Reyndar hefur nú verið stofnaður karlakór innan Rimmugýgjar, og er lögð mikil áhersla á að þrettánmenningarnir æfi söng af kappi fyrir ferðina.

Hátíðin stendur í fimm daga, en víkingarnir verða við undirbúning og frágang í tvo daga fyrir og eftir hátíðina þar sem þeim verður boðið í skoðunarferðir.

„Þetta verður með svipuðu sniði og víkingahátíðin í Hafnarfirði, en auðvitað stærra. Við verðum á ströndinni, og munum berjast í tveimur orrustum á þurru landi á hverjum degi. Svo verður ein sjóorrusta á dag við ströndina sem við munum taka þátt í. Ég veit ekki nákvæmlega hvernig það mun fara fram, en það verður örugglega mjög gaman,“ segir Hafsteinn.

Hann segir að flytja eigi víkingaskip til Dúbaí til að halda sjóorrusturnar. Liðsmenn Rimmugýgjar hafa ekki reynslu af sjóorrustum, þó þeir hafi róið víkingaskipum og tekið land á þeim.

Hafsteinn óttast ekki að menningarmunurinn verði víkingunum erfiður. Áfengisneysla er bönnuð í Dúbaí, en á því eru undantekningar. Hátíðin verður á lokuðu svæði og verður leyfilegt að drekka áfengi á því svæði þegar því hefur verið lokað fyrir almenningi í lok hvers dags.

„Þeir bjóða okkur meira að segja upp á einn bjór á dag, eftir að allir eru farnir, þannig að menn geta svalað sér á einum öl eftir erfiðan dag í bardaga. Svo getum við keypt meira ef við kærum okkur um,“ segir Hafsteinn.

Eftir því sem Fréttablaðið kemst næst er þetta það lengsta sem íslenskir víkingar hafa ferðast á víkingahátíð. Haldnar hafa verið hátíðir í Waco í Texas sem íslenskir víkingar hafa farið á, en það er örlítið nær Íslandi en Dúbaí.