Loftmyndir í þýskum veðurfréttum

Myndatökumaður og veðurfréttamaður frá NTV í Þýskalandi, sem er hluti af RTL-sjónvarpsstöðinni, taka þessa dagana upp veðurfréttir sínar á Íslandi. Nokkur ár eru síðan þeir gerðu þetta síðast.

„Þeir eru orðnir miklir Íslandsvinir. Þeir eru búnir að bíða eftir því að sjá flott veður á Íslandi á veðurspánni og núna eru þeir að fá algjört toppveður,“ segir Arthúr Björgvin Bollason, kynningarfulltrúi Icelandair í Mið-Evrópu. Hann er þeim innan handar meðan á þriggja daga dvöl þeirra stendur.

Þjóðverjarnir eru með litla flugvél meðferðis með myndavél sem þeir senda upp í loft, allt að tvö hundruð metra, og mynda íslenska landslagið. Í gær sendu þeir flugvélina á loft fyrir ofan Perluna, Geysi og Þingvelli og náðu þar flottum myndum. „Hið merkilega er að svona aðferð hefur ekki verið notuð við veðurfréttir í Þýskalandi fram að þessu. Ísland er sem sagt fyrst í röðinni,“ segir Arthúr.

Veðurfréttirnar eru birtar tíu til tólf sinnum á dag og ná þær um þriggja milljóna áhorfi á hverjum degi. Sjónvarpsskjánum er skipt í tvennt. Annar hlutinn er með þýsku veðurfréttunum en hinn með myndum frá Íslandi. „Þetta er dúndur auglýsing, alveg svakaleg,“ segir Arthúr Björgvin.