Kesha viðurkennir átröskun

Bandaríska söngkonan Kesha hefur ákveðið að leita sér læknismeðferðar vegna átröskunar en Kesha, sem er 26 ára, skráði sig inn á meðferðarheimilið Timberline Knolls í Chicago á dögunum.

„Mér finnst mikilvægt að fólk sé samkvæmt sjálfum sér og elski sig, en ég hef átt erfitt með að gera einmitt það. Næstu þrjátíu daga mun ég leita mér aðstoðar vegna átröskunar,“ sagði Kesha í tilkynningu sinni.

Á nýársdag sendi söngkonan frá sér myndband við lagið Dirty Love en myndbandinu leikstýrði hún sjálf. Í kjölfarið birti hún skilaboð á Twitter þar sem hún sagði að árið 2014 yrði hennar besta hingað til.