Fjölda farsíma stolið af fimleikastúlkum

„Þetta voru allt í allt sjö iPhone símar, tveir Samsung Galaxy og tvö peningaveski. Svo þetta er alveg einhver milljón sem hefur tapast,“ segir Thelma Rut Hermannsdóttir, fimleikastúlka úr Gerplu, en einhver óprúttinn aðili kom við í æfingahúsnæði félagsins í Versölum í Kópavogi í gær og hnuplaði níu farsímum af stúlkunum á meðan þær voru við æfingar. Símarnir voru allir í úlpuvösum stúlknanna en yfirleitt geyma þær verðmætin í læstum skápum. 

Iphone-sími Thelmu var tekinn en símann fékk hún í sumar. „Margar stelpurnar voru að fá síma í jólagjöf, meðal annars ein sem fékk allra nýjustu týpuna af iPhone,“ segir Thelma, og bætir við að tjónið sé ekki einungis fjárhagslegt heldur einnig persónulegt. „Það voru fullt af myndum af fjölskyldunni sem eru nú glataðar og einhverjar áttu eftir að setja inn myndir af Norður-Evrópumótinu sem við kepptum á fyrir stuttu,“ segir Thelma, en nokkrar stúlknanna eru í landsliðinu í áhaldafimleikum.

Þjófnaðurinn var tilkynntur til lögreglu í gær og er meðal annars verið að skoða myndbandsupptökur frá æfingahúsnæðinu. „Það er myndavél á ganginum þar sem klefinn okkar er og löggan er að skoða myndbönd. Það er rosalega mikill umgangur um klefann en við vitum alveg hverjir það eru sem fara þar inn og út, bæði stelpurnar sem æfa og foreldrar. Það er því mjög furðulegt að enginn hafi tekið eftir einhverjum ókunnugum,“ segir Thelma. 

Hún segir að hópurinn fylgist grannt með gangi mála á sölusíðum landsins. „Þetta virðist vera einhver sem hefur gert þetta áður því það er búið að slökkva á öllum símunum og engin leið fyrir okkur að rekja þetta. En við fylgjumst vel með á Bland.is.“