Heimsborgarar og héraðshöfðingjar

Háskólinn á Bifröst menntar fólk til leiðandi starfa í atvinnulífinu og samfélaginu, ábyrga einstaklinga sem hafa þekkingu og metnað til þess að ná árangri. Að mörgu er að hyggja þegar slíkt nám er skipulagt. Það þarf að byggja á traustum grunni en jafnframt sífelldri nýsköpun þannig að námið nýtist sem best inn í framtíðina þegar út á vinnumarkaðinn er komið. Enginn sem gengur í gegnum háskóla verður þó nokkurn tímann fullnuma því að landamæri þekkingarinnar eru alltaf að færast út. Háskólanám verður að gera fólk hæfara til að fylgjast með og tileinka sér nýjungar alla starfsævina.

Miklar breytingar eru að verða í Háskólanum á Bifröst sem eru nauðsynlegar til þess að hann gegni enn betur veigamiklu hlutverki sínu í íslensku samfélagi. Nám í skólanum mun almennt verða í lotukennslu frá og með næsta hausti og kennsla í staðnámi og fjarnámi fer fram samhliða. Með þessu er þjónusta skólans við nemendur aukin og fyrirkomulag kennslu stílað inn á að nemendur geti nýtt tíma sinn og orku sem allra best.

Ný námsbraut í matvælarekstrarfræði verður tekin upp í skólanum. Námið er þróað út úr hefðbundnu viðskiptafræðinámi en með sérstakri áherslu á að byggja upp þekkingu á matvælum, innihaldi þeirra, vöruþróun, framleiðslu, flutningum, dreifingu og viðskiptum með matvæli. Lögð er áhersla á þekkingu og skilning á allri verðmætakeðjunni frá frumframleiðslu til endanlegrar sölu í verslun, á veitingastað eða erlendan markað. Námið gefur víðtæka möguleika fyrir fólk til að láta til sín taka alls staðar á þeim fjölmörgu sviðum atvinnulífsins þar sem unnið er með matvæli. Þá verður aukið við framboð í meistaranáminu við skólann, annars vegar með nýrri línu í alþjóðlegri stjórnmálahagfræði og hins vegar með nýrri stjórnunarlínu þar sem áherslur skólans í stjórnunarnámi koma sterkt fram.

Þekking sem dugar vel

Margt annað nýtt er að gerast í Háskólanum á Bifröst. Sl. haust hófst sérstakt tilraunaverkefni um gerð rekstraráætlana fyrir lítil og meðalstór fyrirtæki í samstarfi við sveitarfélög á Vesturlandi og banka. Milli 25 og 30 fyrirtæki taka þátt í að útvega nemendum í viðskiptafræði og lögfræði raunhæf verkefni til að glíma við. Samtök atvinnulífsins styrkja skólann myndarlega til að auka rannsóknir í þágu atvinnulífsins og fleiri aðilar hafa stutt við þau verkefni. Fyrsta rannsóknaverkefninu mun væntanlega ljúka í aprílmánuði en það fjallar um skattsvik í ferðaþjónustu og hefur vakið mikinn áhuga. Sýning um íslenskt nútímaatvinnulíf er í undirbúningi sem væntanlega fer af stað næsta sumar. Þá hefur skólinn annast umsýslu um sérstakt tilraunaverkefni um hækkað menntunarstig í Norðvesturkjördæmi.

Háskólinn á Bifröst veitir nemendum sínum þekkingu sem dugar þeim vel hvert svo sem þeir fara að námi loknu og eiga að hafa möguleika til að standa sig erlendis jafnt sem innanlands. Þannig mótar Háskólinn á Bifröst metnaðarfulla, víðsýna og umburðarlynda heimsborgara sem geta notað hæfileika sýna til fulls. En skólinn er líka Héraðsskólinn í Norðurárdal þar sem nemendur læra að þeir eiga rætur og rækta vináttu, hjálpsemi og traust sín á milli. Bifrestingar eru héraðshöfðingjar, fólk sem þekkir muninn á réttu og röngu og getur greint í sundur metnað og græðgi.