Bankaráð ætlar ekki að borga málskostnað Más

Bankaráð Seðlabanka Íslands hefur ákveðið að borga ekki málskostnað Más Guðmundssonar seðlabankastjóra. Áður hafði þáverandi formaður ráðsins tekið ákvörðun um að borga kostnaðinn. Málskostnaðurinn féll til þegar Már fór í mál við bankann vegna launakjara sinna. Már mun því endurgreiða kostnaðinn.

Hafði ekki heimild

Í ákvörðun bankaráðsins er vísað til skýrslu Ríkisendurskoðunar þar sem fjallað var um að hvorki lög um Seðlabanka Íslands né reglugerðir geri ráð fyrir að formaður bankaráðsins hafi sjálfstæðar valdheimildir.

„Bankaráðið er fjölskipað stjórnvald og þarf því að bera ákvarðanir um útgjöld, sem falla undir verksvið ráðsins, upp í bankaráðinu til formlegrar afgreiðslu,“ segir í samþykkt bankaráðsins. 

Már mun endurgreiða

Bankaráðinu er heimilt, samkvæmt sömu skýrslu Ríkisendurskoðunar, að samþykkja greiðslu kostnaðarins. Það ætlar ráðið hinsvegar ekki að gera.

„Í ljósi efnisatriða málsins er það niðurstaða meirihluta bankaráðs að heimila ekki nú greiðslurnar með sérstakri ályktun. Bankaráðið mun því ekki samþykkja að gera málskostnaðinn að rekstrarkostnaði bankans.“ 

Már hefur sjálfur lýst því yfir að hann muni endurgreiða málskostnaðinn. Það gerði hann í bréfi til ráðsinsdagsettu 11. júlí síðastliðinn.

Ekki allir sammála

Þrír fulltrúar í bankaráði létu bóka sérstaklega um málið en þeir voru ekki sammála meirihluta ráðsins um að hafna því að greiða málskostnaðinn. Töldu þeir sanngirnisrök fyrir því að standa við ákvörðun fyrrverandi formanns ráðsins.

„Í úttekt Ríkisendurskoðunar kemur fram að ekkert hafi komið í ljós sem benti til þess að bankastjórinn sjálfur hafi á nokkurn hátt komið að ákvörðun um, fyrirmælum eða samþykki greiðslu þeirra reikninga, sem hér um ræðir, heldur var hér alfarið um ákvarðanir og fyrirmæli fyrrverandi formanns bankaráðsins að ræða,“ segir í bókun minnihlutans.

Hafði vilyrði fyrir greiðslu

Minnihluti ráðsins bendir á að þó að málið hafi verið höfðað af Má sjálfum hafi áfrýjun þess verið studd af þáverandi formanni bankaráðsins. Það hafi einnig legið fyrir að Már myndi ekki áfrýja til Hæstaréttar án vilyrðis fyrir greiðslu.

„Því telur minnihluti bankaráðs að bæði efnis- og sanngirnisrök séu fyrir því að málskostnaður fyrir hæstarétti teljist til rekstrarkostnaðar Seðlabankans,“ segir minnihlutinn.