Í þrjá mánuði í Marokkó

Leikarinn Jóhannes Haukur Jóhannesson er farinn af landi brott til að leika í bandarískum sjónvarpsþáttum. Þættirnir verða teknir upp í Marokkó og dvelur Jóhannes þar í landi fram í miðjan desember.

Samkvæmt heimildum Fréttablaðsins leikur Jóhannes í sex þáttum en aðspurður um verkefnið vill leikarinn ekkert tjá sig um sjónvarpsþættina.

Jóhannes hefur átt mikilli velgengni að fagna hér á landi síðustu ár og ber þar helst að nefna hlutverk Tóta í kvikmyndinni Svartur á leik. Fyrir þá frammistöðu fékk hann tilnefningu til Edduverðlaunanna árið 2013.