Brimbrettafjör á Balí

Eftir ánægjulega dvöl í Tælandi var ferð okkar næst heitið til Balí í Indónesíu. Á leiðinni þangað millilentum við í höfuðborg Malasíu, Kúala Lúmpúr og dvöldum þar í einn sólarhring. Þetta er nútímaleg og annasöm stórborg sem hýsir um sjö milljónir íbúa.

Borgin er afar vinsæll áfangastaður ferðamanna og býður upp á fjölmarga afþreyingarmöguleika, spennandi menningu og afbragðs skoðunarferðir. Þarna er heill hellingur af hofum, heillandi mörkuðum, söfnum og sögulegum byggingum.

Flestir heimamenn tala góða ensku í Kúala Lúmpúr enda var Malasía bresk nýlenda allt til ársins 1957. Okkur var það strax ljóst að þarna væri nóg til af peningum. Borgin býður enda upp á mikið af ódýrum lúxus. Það virðist vera bullandi vöxtur í Malasíu.

Þarna er til dæmis að finna mörg af ódýrustu fimm stjörnu hótelum heims og dvöldum við einmitt á einu slíku eða Traders Hotel. Það stendur við hinn svokallaða Gyllta þríhyrning þar sem hótelin standa í röðum innan um glæsilega næturklúbba, verslunarmiðstöðvar og hin heimsfrægu háhýsi, Petrona Twin Towers.

Það hefði verið frábært að geta stoppað lengur í Malasíu en okkur þótti heldur ekki leiðinlegt að halda för okkar áfram til Balí á Indónesíu. Balí er hrikalega falleg eldfjallaeyja sem býður upp á allt það besta sem maður getur óskað sér fyrir gott frí í sólinni. Eins og til dæmis frábærar strendur og ódýrt verðlag. Hvað þarf maður meira?

Balí er sannkallað gósenland þar sem trjágreinarnar svigna undan ávöxtum og sjórinn iðar af fiski. Þarna geta  allir fundið sér einhverja afþreyingu við sitt hæfi. Við fórum þarna hinsvegar til að kynnast brimbrettaíþróttinni en Balí býður upp á frábærar aðstæður til brimbrettaiðkunar. Við skráðum okkur á námskeið hjá Lapoint Surfcamp, í þorpinu Canguu sem er rólegur og fallegur strandbær á vesturströnd eyjunnar.

Þarna dvöldum við svo í tæpa viku ásamt nokkrum öðrum skandínavískum ungmennum og gerðum okkar besta til þess að ná tökum á þessari skemmtilegu og mjög krefjandi íþrótt. Vikan á Balí var hrikalega skemmtileg og það er klárlega nauðsynlegt að heimsækja þennan stað aftur. Helst þyrfti maður að fara þangað á hverju ári.

Vinirnir Frosti Logason og Sigurður Þorsteinsson fara í sex vikna ferðalag um Asíu og Afríku. Þeir leyfa lesendum Vísis að fylgjast með ferðalaginu í máli, myndum og myndböndum. Félagarnir fara meðal annars í safarí í Suður-Afríku, fara á brimbrettanámskeið á Balí og læra að kafa í Taílandi. Verkefnið gengur undir heitinu AsíAfríka.