„Sagðistu ekki vilja líta út eins og Maggi mörgæs?“

Saga Garðarsdóttir og Steindi Jr. stjórna Snapchat-reikningi Nova þennan mánuðinn og kalla þau sig Ostadúettinn. Fyrstu snöppin þeirra eru komin á YouTube og kennir þar ýmissa grasa.

Í einu atriði sést Steindi Jr. á hárgreiðslustofu þar sem hann brjálast við Sögu yfir því að líta út eins og Maggi mörgæs. Hann vildi nefnilega líta út eins og Maggi Lego.

Þá sjást einnig áður óséð atriði úr Hreinum Skildi, nýju sjónvarpsseríunni hans Steinda, í myndbandinu.

Nova hefur verið að fá þekkt fólk til að stjórna Snapchat-reikningi sínum uppá síðkastið en fyrstu snappararnir voru Dóri DNA og Björn Bragi. Síðan tók Unnsteinn Manuel við og því næst Þór Bæring.

Gif-drottningin Berglind Festival gagnrýndi þessa nýbreytni Nova fyrir stuttu þar sem engar konur tóku þátt í gríninu. Með tilkomu Sögu hefur orðið breyting á þessu en óljóst er hver tekur við keflinu af Sögu og Steinda.