Svona pakkar þú fyrir útileguna

Nú er verslunarmannahelgin að ganga í garð og halda þúsundir Íslendinga af stað í útilegur um land allt. Fréttablaðið tók saman nokkur góð útileguráð sem mikilvægt er að hafa í huga þegar pakkað er niður í ferðalagið.

1 Áður en hafist er handa við að pakka niður er ágætt að huga að því hvernig tösku best er að hafa meðferðis. Rúmgóðar íþróttatöskur geta oft reynst vel en ef troðfylla á töskuna og þyngslin verða mikil er jafnvel betra að pakka í ferðatösku á hjólum. Þetta er einstaklega sniðugt fyrir þá sem eiga við bakmeiðsl að stríða eða eru gjarnir á að fá vöðvabólgu.

2 Þegar búið er að velja tösku er best að taka allt saman sem viðkomandi vill hafa meðferðis og raða upp, á sófann eða á gólfið. Þegar það er klárt er skaltu taka þriðjung frá og setja aftur upp í skáp. Margir brenna sig á því að pakka alltof miklu niður fyrir ferðalagið, enda algjör óþarfi að tæma fataskápinn fyrir örfáa daga úti á landi.

3 Til að nýta plássið sem allra best er mælt með því að troðfylla skóna eða stígvélin af sokkum og nærbuxum. Skórnir fara svo neðst í töskuna.

4 Víða um land eru sveitaböll þar sem gaman er að klæðast örlítið fínni fötum þó svo að pollabuxurnar og stígvélin standi alltaf fyrir sínu. Til að koma í veg fyrir að óþarfa krumpur komist í fötin er mælt með því að leggja flíkina hálfa ofan í töskuna og láta hinn helminginn standa út fyrir. Það sama er gert með næstu flík nema hinum megin. Þannig gengur þetta koll af kolli þar til allar flíkurnar eru komnar í töskuna en þá er það sem stendur út fyrir pakkað aftur inn í töskuna, flík fyrir flík í eins konar fléttuhreyfingu.

Ekki gleyma þessu:

• Naglaklippum
• Plástrum
• Flísatöng
• Svitalyktareyði
• Verkjatöflum
• Handspritti
• Þurrsjampói Blautklútum
• Hleðslutæki
• Rakakremi
• Sólgleraugum
• Linsuvökva