Margt sem nú þykir hversdagslegt byrjaði hér

Afró, tangó, samba, salsa, flamengo, magadans og Bollywood. Allt eru þetta dansar sem hafa verið iðkaðir í Kramhúsinu í þrjátíu ára sögu þess. Það hefur alltaf verið rekið á sama stað, við Skólavörðustíg 12, í einu af hinum földu bakhúsum í miðborginni.

„Það var mikil þörf fyrir Kramhúsið á sínum tíma,“ segir stofnandinn Hafdís Árnadóttir. Frá fyrstu stundu fluttum við inn gestakennara í dansi, leiklist og látbragðsleik. Margt sem nú er þekkt og þykir hversdagslegt byrjaði hér.

Við vorum frumkvöðlar í fjölmenningardönsum og því var starfsemin innspýting í listalífið,“ segir hún og nefnir sem dæmi að afródansar hafi verið stór þáttur í starfseminni.

„Við erum alltaf með kennara frá Gíneu að kenna afródans og trommararnir eru sestir að hér á landi. Hingað komu kennarar frá Bandaríkjunum að kenna djassdans og nútímadans og frá Danmörku og Englandi að kenna leiklist og dans.

Argentínski tangóinn blossaði upp 1985, þá var Svisslendingur staddur á landinu að skrifa leikrit, labbaði hér inn og spurði hvort hann gæti fengið að kenna tangó, hann vantaði pening til að geta dvalið lengur á Íslandi. Hann varð vinsæll og kom hingað af og til í tíu ár en rak líka tangóstúdíó í Zürich.“

Sjálf kveðst Hafdís kenna dans og leikfimi, en hafði hún kynnst svona starfsemi annars staðar í heiminum þegar hún kom Kramhúsinu á fót?

„Já, ég hafði sótt námskeið í Englandi og Danmörku og kynntist dansverkstæðum þar sem blandað var saman dansi, leiklist og spuna. Árni Pétur Guðjónsson leikari kenndi spuna hér hvað lengst og Anna Richardsdóttir dansari frá Akureyri var þá nýkomin úr kennslu í Svíþjóð. Við vorum svo heppin að fá til okkar fólk með nýja strauma.“

Hafdís nefnir líka leiksmiðju fyrir börn sem fastan lið í Kramhúsinu. Þar er blandað saman tónlist, leiklist og margs konar hreyfingu. „Elfa Lilja Gísladóttir tónlistarkennari mótaði barnakennsluna og hefur sinnt henni lengst af,“ segir hún.

Nú var Kramhúsið að gefa út bók sem inniheldur sögu þess í þrjátíu ár í máli og myndum og ber titilinn Kramhúsið – orkustöð í miðbænum.

„Hún Brynhildur Björnsdóttir skrifaði bókina og svo sáu þeir um útlitið grafíski hönnuðurinn Tómas Jónsson og Spessi ljósmyndari,“ upplýsir Hafdís og segir bókina einungis fáanlega í Kramhúsinu.