Spennt fyrir 2015

Sigríður Kling er litríkur persónuleiki sem sjaldan liggur á skoðunum sínum. Hún horfir til stjarnanna og segist hafa gott næmi fyrir því sem fram undan er. Sigga er bjartsýn á komandi ár og segir margt spennandi eiga eftir að gerast.

Sigga var ekkert að hika þegar hún var spurð um árið 2015. „Ég hef velt nýju ári mikið fyrir mér. Margir muna kannski eftir heimsendaspá 21. desember 2012 en þá er talið að dagatali Inka eða Maya hafi lokið. Margar kenningar eru uppi um að á þessum degi fyrir tveimur árum hafi lokið ákveðnum myrkum kafla í sögu jarðarinnar. Frá þeim degi hafi opnast á bjartari tíma með minni spillingu og ljótleika en áður þekktist. Ég vil trúa þessu,“ segir Sigga.

„Einnig tel ég mikilvægt að við trúum á það góða, það býr nefnilega inni í okkur. Ef við horfum á allt með neikvæðum augum þokast lítið í betri átt. Ég vil hvetja Íslendinga til að tileinka sér jákvæðara hugarfar á nýju ári. Miðað við að lýðræðið hafi fæðst 17. júní 1944 þá erum við að sigla inn í mjög gott ár. Við þurfum þó að hafa fyrir þessum góðu breytingum vegna þess að ekkert gerist ef við tökum ekki þátt í þeim,“ segir Sigga og bendir á að það sé gott fyrir alla að finna Pollýönnu í sér.

„Það leynast góðar fréttir í fjölmiðlum en flestir sjá einungis þessar neikvæðu. Þar sem mikið streymi er af neikvæðum fréttum hvaðanæva úr heiminum er stundum gott að líta í eigin barm og skoða hvað maður hefur það í rauninni gott. Það eru svo margir miklu verr staddir,“ segir Sigga enn fremur. „Það þýðir ekkert að bíða eftir að hamingjan banki upp á með pitsunni. Við þurfum að finna hana inni í okkur og finna kraftinn í lífinu.“

Hún segist stundum vakna upp að morgni og sjá varla fram úr deginum. „Ég bið þá lífið að leysa þennan dag á góðan hátt og síðan treysti ég að það gerist. Jákvæð hugsun fleytir manni langt,“ segir Sigga og rifjar upp ástandið þegar Geir bað Guð að blessa Ísland. „Ég var stödd á Korputorgi og brast í grát yfir hörmungunum sem ættu eftir að dynja yfir okkur. Enginn matur yrði til í búðum, né lyf fyrir þá veiku. Auðvitað var þetta ömurleg stund en horfum til þess sem vel hefur verið gert síðan,“ segir hún. „Ég er spennt fyrir árinu 2015 og tel að margt muni koma fólki ánægjulega á óvart.“