Hætti kennslu eftir árás nemanda

Kennari sem varð fyrir grófri árás nemanda síns í apríl 2008 segir ofbeldi gegn kennurum vera algengara en fólk heldur. Hún segir úrræðaleysi og þöggun einkenna vandamálið.

Nemandinn sem réðst á kennarann var tólf ára drengur sem átti við geðræn vandamál að stríða. Árásin atvikaðist þannig að drengnum mislíkaði eitthvað og missti stjórn á skapi sínu, en það gerðist reglulega. Hann æddi að kennaranum og slengdi henni utan í vegg með þeim afleiðingum að hún slasaðist og sá á henni.

Eftir atvikið fór kennarinn á heilsugæslustöð til að fá áverkavottorð. Þar var hún hvött til að kæra árásina til lögreglu.

Nýútskrifuð og óörugg um sína stöðu

„Þetta var mitt fyrsta starfsár svo ég var óörugg með mína stöðu og ákvað að ráðfæra mig við skólastjórann. Hún sagði mér að slíkt tíðkaðist ekki og væri ekki gert. Þetta tilvik væri ekki til þess fallið að kæra það til lögreglu,“ segir kennarinn. Hún telur að hlífðarskildi hafi verið haldið yfir drengnum og að enginn hafi verið tilbúinn að gera það sem mestu máli skipti – að takast á við vandann.

Drengurinn hefði átt að fá hjálp

Hún segir drenginn hafa haldið nemendum og kennurum í heljargreipum þegar hann reiddist, og að úrræðaleysið hafi verið algjört.

„Mér leið líka mjög illa vegna hinna barnanna. Þegar hann tók þessi köst þá varð maður bara að segja þeim að leita skjóls því stólar og ruslafötur flugu um alla stofuna. Það hefði auðvitað bara þurft að grípa í taumana strax eftir árásina, ekki síst svo hann fengi hjálp.“

Algjör þöggun

Kennarinn segist hafa komið að lokuðum dyrum bæði hjá skólanum og því sveitarfélagi sem hann tilheyrði. Hún hafi gefið skýrslur en ekkert hafi verið aðhafst frekar í málinu. Hún upplifði mikla streitu í kjölfar árásarinnar og lét skömmu seinna af störfum við skólann.

„Ég hélt ég væri komin í draumastarfið eftir þriggja ára háskólanám, en þetta tók svo á mig að ég hætti og gat ekki hugsað mér að kenna aftur. Ég var mjög brotin og hætti að geta sofið,“ segir kennarinn og bætir því við að hennar reynsla sé ekki einsdæmi. Ofbeldi af þessum toga sé einfaldlega þaggað niður og því beri ekki mikið á því.