Kannað á hótelum hvort gestur hafi ekki skilað sér

Lögregla er nú að kanna hvort einhvern gest vantaði á hótel og gististaði á höfuðborgarsvæðinu í nótt þar sem líkur benda til að maðurinn, sem talið er að fallið hafi í sjóinn af hafnargarði í Reykjavíkurhöfn í gærkvöldi, hafi verið erlendur ferðamaður. Maðurinn, sem tilkynnti um málið, er líka erlendur ferðamaður og höfðu þeir átt spjall saman á ensku, en þekktust ekki.

Hann sá manninn ekki falla í sjóinn, en telur víst að hann hafi ekki snúið aftur af garðinum og því fallið í sjóinn, en ekkert handrið er á honum.

Ítarleg leit björgunarsveita í gærkvöldi  bar ekki árangur og var henni frestað upp úr miðnætti. 30 björgunarsveitarmenn tóku þátt í leitinni á landi, auk áhafna á einu björgunarskipi, fjórum björgunarbátum og léttabáti frá Gæslunni.

Kafarar tóku einnig þátt í leitinni. Í morgun var svo ákveðið að menn ríkislögreglustjóra og Gæslunnar önnuðust leit í höfninni í dag og óskar lögregla eftir upplýsingum, ef einhvers er saknað.