Ólíkar vinkonur með góða verkaskiptingu

„Við rákumst á það, vinkonurnar, að það er algjörlega ómögulegt að nálgast á einum stað upplýsingar um þau námskeið sem maður hefur áhuga á. Svo missir maður kannski af því sem hefði verið kjörið fyrir mann,“ segir Ásta Bærings en hún opnaði á dögunum vefsíðuna Framabraut ásamt vinkonu sinni Katrínu Dögg Hilmarsdóttur.

„Þetta byrjaði sem hugmynd um leitarvél, svo vatt þetta upp á sig og varð að stærri síðu með umfjöllunum, pistlum, myndböndum og bara alls konar sem við teljum að gagnist fólki sem hefur áhuga á að fræðast meira og vera vakandi fyrir nýjum hlutum.“ Framabraut var opnuð síðastliðinn sunnudag en Ásta og Katrín Dögg standa tvær að verkefninu ásamt hóp pistlahöfunda. „Við erum báðar í fullri vinnu og með tvö börn, þannig að helgarnar og kvöldin hafa farið í þetta,“ segir Ásta.

Hún og Katrín eru báðar viðskiptafræðingar. „Við erum búnar að vera vinkonur frá því í Versló og höfum verið saman í vinahóp í 15 ár. Það er rosalega gaman að vera í svona verkefni með vini, það gerir þetta enn skemmtilegra.“ Ásta segir þær vinkonurnar vinna mjög vel saman „Samstarfið hefur gengið mjög vel og verkefnið búið að teygjast og togast í áttir sem maður átti ekki von á af því að við erum svo ólíkar.“

Vefsíðan mun í framtíðinni halda áfram að stækka. „Við ætlum að fá háskóla- og meistaranemendur til þess að senda okkur efni úr rannsóknum og niðurstöðum þar sem eitthvað spennandi kemur fram sem fjallar um íslenskt atvinnulíf,“ heldur Ásta áfram. „Við erum með á teikniborðinu leitarvél með námskeiðum fyrir ráðstefnur og fyrirlestra. Það er greinilega áhugi því við erum búnar að fá pósta og fyrirspurnir, til dæmis um hvort við ætlum að hafa þetta á fleiri tungumálum."

Hugmyndin að Framabraut kom fyrst fram í vor og byrjuðu Ásta og Katrín Dögg að skipuleggja í júlí. „Við fórum í rauninni rólega af stað og helltum okkur út í þetta í byrjun september. Þannig að þetta er ekki búið að taka langan tíma. Ég tók vefsíðuna að mér og Katrín efnið og að spjalla við pistlahöfunda. Við náðum að hafa fína verkaskiptingu, það er örugglega ástæðan fyrir því að við náum að keyra þetta svona hratt í gegn.“