EHF-bikarinn til Ungverjalands

Pick Szeged vann Montpellier 29-28 í úrslitaleik EHF-bikarsins í handbolta sem fór fram í Berlín í dag. Staðan í hálfleik var 16-14, Ungverjunum í vil.

Ference Ilyés var markahæstur í liði Pick Szeged með sjö mörk, en Svíinn Jonas Larholm kom næstur með fimm. Dragan Gajic var langmarkahæstur í liði Frakkanna með tíu mörk.

Liðin sem töpuðu í undanúrslitnuum í gær, HCM Constanta frá Rúmeníu og Füsche Berlin, áttust einnig við í dag. Berlínarrefir Dags Sigurðssonar höfðu betur, 29-28, eftir að Rúmenarnir höfðu leitt með einu marki í hálfleik.

Iker Romero skoraði átta mörk fyrir Füsche Berlin og Sven-Sören Christophersen sex. Iuliu Csepreghi var markahæstur í liði Rúmenanna með sex mörk.