Jólaundirbúningur í hægagangi

Jólasýning Árbæjarsafns verður opnuð á morgun og verður opin á aðventunni fram að jólum. Sigurlaugur Ingólfsson, verkefnastjóri Árbæjarsafns, segir sýninguna vera fastan lið í jólaundirbúningnum.

„Fólk virðist vilja upplifa gömlu jólastemninguna í ró og næði. Hér gerist allt miklu hægar og það virðist fara vel í fólk á aðventunni. Þessir sunnudagar á aðventunni eru allavega stærstu dagarnir hér hjá okkur á safninu og maður fær jólin alveg beint í æð. Þetta eru erfiðustu dagarnir vegna fjölda verkefna og mikils mannfjölda, en jafnframt skemmtilegustu dagarnir.“

Á sýningunni er verið að undirbúa jólin eins og þau voru í gamla daga. Skorið er út laufabrauð í einu húsinu, kerti steypt úr tólg og jólaskraut föndrað. Prentarar prenta jólakort og skata er soðin í einu húsinu, til að fá réttu lyktina. Einnig er dansað í kringum jólatré og jólasveinarnir koma í heimsókn en Sigurlaugur segir að þeir mæti í gömlu fötunum að sérstakri ósk safnsins.