Frekari vaxtalækkun ræðst af stöðu á vinnumarkaði

Óvíst er hvort færi gefst á frekari lækkun vaxta Seðlabankans fyrr en dregið hefur úr þeirri óvissu sem nú ríkir á vinnumarkaði

Þetta segir í greinargerð Seðlabankans til fjármála- og efnahagsráðherra. Greinargerðin er skrifuð vegna þess að verðbólga fór undir neðri þolmörk Seðlabankans í desember og stendur nú í 0,8 prósentum.

Seðlabankinn segir að langvarandi verðhjöðnun sé af margvíslegum ástæðum óæskilegt ástand. Þó svo að mjög litlar líkur séu um þessar mundir á því hér á landi sé það hlutverk peningastefnunnar að beina verðbólgunni í átt að verðbólgumarkmiði.

Í þessu samband verði þó að líta til þriggja þátta sem á þessu stigi kalla á varfærin viðbrögð. Í fyrsta lagi að verðbólga sé um þessar mundir verulega undir verðbólgumarkmiði fyrst og fremst vegna lækkunar innflutningsverðs sakir alþjóðlegrar þróunar og tiltölulega stöðugs gengis. Laun hafi hins vegar hækkað að undanförnu töluvert umfram það sem til lengdar samrýmist verðbólgumarkmiðinu. Viðsnúningur í annað hvort erlendri verðbólgu eða gengi krónunnar gæti því aukið verðbólguna umtalsvert á stuttum tíma.

Í öðru lagi þá sé stutt síðan verðbólguvæntingar mældust í samræmi við verðbólgumarkmiðið og því hafi ekki mikið reynt á kjölfestu þeirra við markmið.

Í þriðja lagi, og síðast en ekki síst, þurfi að horfa til þess óróleika sem gætir á vinnumarkaði og sem gæti leitt til þess að verðbólga ykist hratt á ný óháð þróun erlendrar verðbólgu.