Hafnar áburði um áróðursdeild

Í ræðu á borgarstjórnarfundi í gærkvöldi um gagnsæi í fjármálum Reykjavíkurborgar hafði Júlíus Vífill Ingvarsson, borgarfulltrúi Sjálfstæðisflokksins, orð á því að upplýsinga- og vefdeild Reykjavíkurborgar bæri út áróður í þágu núverandi meirihluta.

„Ég sé engan áróður eða eitthvað sem óþarfi er og neita því alfarið að upplýsinga- og vefdeild Reykjavíkur sé áróðursdeild,“ svaraði Jón Gnarr borgarstjóri um þær fréttir sem deildin hafði birt á vef Reykjavíkurborgar.

„Að hafa svona orð um starfsfólk borgarinnar er dónaskapur og ekkert annað,“ bætti hann við.

Í samtali við Fréttablaðið skýrði Júlíus Vífill ummæli sín á þennan veg: „Nú eru tíu manns starfandi þar við að koma fréttum og upplýsingum á framfæri. Það er nokkuð vel í lagt.“

Á fundinum kom líka fram gagnrýni á vinnubrögð meirihlutans. „Fjórðungur þeirra tillagna sem við leggjum fram í borgarráði eru svæfðar og stungið ofan í skúffu. Þetta er ómerkileg og gamaldags pólitík sem ætti að vera búið að leggja til hliðar,“ segir Júlíus og bætir við að slík vinnubrögð séu í ósamræmi við ábendingar frá úttektarnefnd um stjórnskipun borgarinnar.