Launagreiðslur fyrirtækja gætu aukist um 60 milljarða á ári

Lítil fyrirtæki á Íslandi gætu hugsað sér að fjölga störfum um 14.000 á næstu 3-5 árum ef marka má könnun sem Samtök atvinnulífsins gerðu fyrir samtökin Litla Ísland.

Litla Ísland er vettvangur þar sem smá fyrirtæki vinna saman óháð atvinnugreinum. Til að áformin um vöxt geti gengið eftir er mikið verk að vinna við að bæta starfsumhverfi lítilla fyrirtækja á Íslandi en samkvæmt könnun Capacent síðasta haust taldi rúmlega helmingur Íslendinga að starfsumhverfi lítilla fyrirtækja væri slæmt.

Útreikningar sem birtir voru á heimasíðu Samtaka atvinnulífsins í dag sýna að launagreiðslur fyrirtækjanna munu aukast um 60 milljarða á ári gangi þessi áfrom eftir. Í dag nema launagreiðslur fyrirtækjanna rúmlega 300 milljörðum á ári.

Af þessum 60 milljörðum fá ríkið og sveitarfélög að lágmarki 37 milljarða króna til baka, um tvo þriðju, en við það bætast tekjur af vörugjöldum og tollum svo upphæðin gæti verið hærri.