Stjórnarflokkarnir njóta mests trausts hvað lög og reglu varðar

Flestir telja Sjálfstæðis- og Framsóknarflokkinn vera besta til þess fallna að viðhalda lögum og reglu. Þetta kemur fram í nýrri könnun MMR.

Könnuð var afstaða fólks til þess hvaða stjórnmálaflokka það teldi besta til þess fallna að leiða fimm málaflokka tengda grunnstoðum samfélagsins. Þeir fimm málaflokkar sem um ræðir voru; lög og regla almennt, heilbrigðismál, mennta- og skólamál, nýting náttúruauðlinda og umhverfismál.



Þá sögðu 39,9 prósent þátttakenda Sjálfstæðisflokkinn bestan til þess fallinn að leiða málaflokkinn Lög og regla almennt og 12,5 prósent sögðu Framsóknarflokkinn.

Einungis þriðjungur taldi annan hvorn ríkisstjórnarflokkanna bestan til þess fallinn að leiða málaflokkinn umhverfismál. Örlítið fleiri völdu Sjálfstæðisflokkinn, eða 19,2 prósent en 16,3 prósent Framsóknarflokkinn. Til samanburðar töldu 38,1 prósent Vinstri-græn vera best til þess fallin að leiða málaflokkinn. Það sama má segja um málaflokkinn Nýting náttúruauðlinda, en þá sögðu 25 prósent þátttakenda Vinstri-græn en 23 prósent Sjálfstæðisflokkinn og 16,5 prósent Framsóknarflokkinn.

Þegar spurt var hvaða flokkur væri bestur til þess fallinn að sjá um heilbrigðismál kom Sjálfstæðisflokkurinn best út með 33,4 prósent en Samfylking þar á eftir með 24,5 prósent þátttakenda. Síðastir í röðinni voru Píratar með 4,4 prósent og Framsóknarflokkurinn með 12,2 prósent.

Vert er að taka fram að Lög og regla almennt var eini málaflokkurinn af þeim fimm sem að meirihluti þátttakenda lýsti yfir trausti til sitjandi stjórnarflokka.

Um aðferðarfræði könnunar MMR:

Úrtak: Einstaklingar 18 ára og eldri valdir handahófskennt úr hópi álitsgjafa MMR.

Könnunaraðferð: Spurningavagn MMR

Svarfjöldi: 981 einstaklingar

Dagsetning framkvæmdar: 9.-15. janúar 2014