Vill virkja í neðri hluta Þjórsár

Ragnheiður Elín Árnadóttir iðnaðarráðherra segir að vatnsaflsvirkjanir séu besti kosturinn í virkjunarmálum og horfir til neðri hluta Þjórsár í því samhengi.

„Ég er þeirrar skoðunar að við eigum að líta til vatnsaflsins meira en síðasta ríkisstjórn þegar hún var að klára rammaáætlun vegna þess að þar eru virkjanir sem eru hagkvæmar og eru á röskuðu svæði.

Við erum öll sammála um að fara ekki inn á óröskuð svæði ef við þurfum þess ekki. Það eru virkjanakostir á röskuðum svæðum þar sem að umhverfisáhrif eru tiltölulega lítil. Þannig að ég held að við ættum að einbeita okkur að því,“ segir Ragnheiður Elín sem er gestur vikunnar í Pólitíkinni. Þáttinn í heild sinni má sjá hér að ofan.

Ragnheiður segir að neðri hluti Þjórsár sé mjög heppilegt virkjunarsvæði.

„Það þarf ekki að koma neinum á óvart að ég er hlynnt framkvæmdum í neðri hluta Þjórsár. Ég tel raunar að það sé eitthvað sem við hefðum átt fyrir löngu að vera farin í. Rammaáætlun er í því ferli sem hún er í núna. Það voru vonbrigði að verkefnastjórnin skyldi ekki a.m.k. setja tvær efri virkjanirnar í nýtingarflokk. Svo eru það aðrar virkjanir eins og til dæmis Hagavatnsvirkjun sem er beinlínis með jákvæð umhverfisáhrif og verkefnastjórninni var falið að taka afstöðu til.

Ég held að það hafi verið fyrir hrein mistök að hún hafi ekki lent í nýtingarflokki á sínum tíma,“ segir Ragnheiður.