Hálfur milljarður í hjólastíga

500 milljónum króna verður varið í gerð hjólastíga í Reykjavík á árinu. Áætlun þess efnis var samþykkt í borgarráði í gær og tekur hún til bæði til nýrra hjólastíga og endurbóta á eldri stígum.

Áætlunin er þríþætt; fyrst er að telja stofnstíga sem unnið er að í samvinnu við Vegagerðina. Þar eru bæði nýir stígar og endurbætur á eldri stígum þar sem áhersla er lögð á að skilja að gangandi umferð og hjólandi.

Meðal verkefna í þeim hluta áætlunarinnar er nýr hjólastígur í Öskjuhlíð frá Flugvallar vegi að HR og meðfram Kringlumýrarbraut á tveimur stöðum. Kostnaður við þennan lið er áætlaður um 275 milljónir króna.

Einnig er gert ráð fyrir að gera nýja hjólastíga á nokkrum stöðum samhliða endurnýjun gönguleiða. Þar á meðal eru stígar á Háaleitisbraut milli Bústaðavegar og Brekkugerðis, Stjörnugróf milli Bústaðavegar og Traðarlands og meðfram syðsta hluta Suðurgötu frá Starhaga og inn Einarsnes að Bauganesi. Kostnaðaráætlun þessara verka er 85 milljónir króna.

Þá verður áfram unnið við endurnýjun Borgartúns og er áætlað að verja 80 milljónum króna til hjólastíga í Borgartúni.

Í þriðja lagi heimilaði borgarráð að hefja undirbúning og hönnun vegna göngu- og hjólastíga í Elliðaárdal, auk brúar yfir Elliðaár við Rafstöð. 50 milljónir krónar eru áætlaðir til þessa verkefnis. Nánari upplýsingar um fyrirhugaða stígagerð má nálgast á vef Reykjavíkurborgar, auk yfirlitskorta.