Fundur um framtíð innanlandsflugs

Framtíð innanlandsflugs verður til umræðu á fundi í Iðnó fimmtudaginn 20. febrúar. Innanríkisráðuneytið boðar til fundarins þar sem kynntar verða félagshagfræðilegar greiningar á innanlandsfluginu. Fundurinn hefst kl. 8:30 og stendur til kl. 10.



Hanna Birna Kristjánsdóttir mun flytja ávarp á fundinum þar sem hún reifar mikilvægi áætlunarflugsins innanlands fyrir öryggi og búsetugæði.

Vilhjálmur Hilmarsson hjá Manniviti mun því næst segja frá helstu niðurstöðum greiningarinnar á framtíð innanlandsflugsins. Vilhjálmur vann greininguna ásamt Ástu Þorleifsdóttur, sérfræðingi í innanríkisráðuneytinu, en hluti niðurstaðna var kynntur á rannsóknarþingi Vegagerðarinnar seint á síðasta ári.

Í tilkynningu frá ráðuneytinu kemur meðal annars fram að markmið félagshagfræðilegrar greinar „er að meta þjóðhagslegan ávinning eða tap með kostnaðar/ábatagreiningu en huga jafnframt að samfélagslegum ávinningi sem ekki verður mældur í krónum og aurum svo sem búsetugæðum. Með þessari aðferð má greina á milli arðsemi mismunandi valkosta.“



Pallborðsumræður verða í lok fundar þar sem fulltrúar með ýmis sjónarhorn á þýðingu innanlandsflugsins taka þátt. Fundarmenn eru beðnir á að senda skráningu á netfangið skraning@irr.is