Eyjamenn verja sinn gráa her

Innanríkisráðuneytið taldi á síðasta ári að bæjarstjórn Vestmannaeyja væri óheimilt að fella niður fasteignagjöld á íbúðarhúsnæði 70 ára og eldri. Það var fyrst gert árið 2012, aftur á síðasta ári og í fjárhagsáætlun fyrir nýbyrjað ár er stefnt að þessu þrátt fyrir athugasemd ráðuneytisins. Þetta kemur fram í Eyjafréttum.

Málið er enn til skoðunar í ráðuneytinu en bæjarstjóri segir að bæjarstjórn fari að lögum um málefni aldraðra. Elliði Vignisson bæjarstjóri í Eyjum segir að ekki liggi fyrir úrskurður heldur ábending frá ráðuneytinu um að það leiki vafi á lögmæti þessarar ákvörðunar. Eyjamenn ætla að bíða úrskurðar, segjast munu hlíta honum en vissulega veki það ákveðnar spurningar þegar sveitarfélagi er ekki heimilt að styðja eldri borgara við búsetu í eigin húsnæði á þennan máta.

„Við ætlum að láta reyna á það. Við teljum okkur vera í fullum rétti. Og höfum sent svar til ráðuneytisins þar sem við bendum á að það séu til önnur lög og reglugerðir sem við styðjumst við.“

Hver er hugmyndafræðin á bak við þetta?

„Fyrst og fremst sú að gera öldruðum kleift að búa í eigin húsnæði eins lengi og mögulegt er. Við erum illu heilli með biðlista inn á dvalarheimili aldraðra og viljum styðja aldraða í auknu frelsi til búsetuvals, með að létta álögum af þeim; með að þeir greiði ekki fasteignagjöld af sínu íbúðahúsnæði hafi þeir möguleika á að búa lengur í eigin húsnæði.“