Bandarísk ófærð tefur borun í Kjósinni

Ófærð í Bandaríkjunum hafði þau óvæntu áhrif að tefja borun eftir heitu vatni í landi Möðruvalla í Kjós.

Þegar hefur verið boruð ein hola á Möðruvöllum.

„Borkrónan sem nota á við framhaldið átti að vera komin til landsins en vegna ófærðar innnanlands í USA fór hún ekki þaðan fyrr en í gær og gæti það haft áhrif á framvinduna allra næstu daga,“ segir á vef Kjósarhrepps.

Í leit að nægjanlega heitu vatni var ákveðið að bora aðra holu áður en ráðist verði í að dýpka fyrri holuna úr ríflega 800 metrum í allt að 1500 metra.